Привршува реконструкцијата на водоводната мрежа на улицата „11 Октомври“ во Куманово, соопштија денеска од Општина Куманово. Со проектот, вреден 24,5 милиони денари, (24.575.304,31) надлежните велат дека се обезбедува посигурно и поквалитетно водоснабдување за жителите. По завршувањето на градежните работи е предвидена целосна санација на коловозот и нормализирање на сообраќајот.
– Со оваа инвестиција обезбедуваме посигурно и поквалитетно водоснабдување за граѓаните. По завршувањето на работите ќе следува целосна санација на коловозот и нормализирање на сообраќајот. Продолжуваме со реализација на проекти што ја унапредуваат комуналната инфраструктура и квалитетот на живот во нашиот град – објави градоначалникот Максим Димитриевски.
Од Општина Куманово апелираат до граѓаните да бидат внимателни и трпеливи поради изменетиот режим на сообраќај за време на изведувањето на работите, бидејќи улицата „11 Октомври“ е една од главните влезни сообраќајници во градот.
