Секторот за внатрешни работи – Скопје спроведе превентивни активности со цел спречување на пожари. Полициски службеници од Одделението за превенција, денеска реализираа превентивни активности во туристичкиот центар Кањон Матка и село Горна Матка, соопштија попладнево од Министерството за внатрешни работи.
– Полициските службеници во разговор со граѓаните укажуваа на потребата од максимална совесност и грижа за шумскиот фонд. Исто така, на граѓаните им беше укажано дека предизвикувањето пожари е кривично дело, што соодветно законски се санкционира. Доколку пак забележат пожар, тоа веднаш да го пријават на телефонскиот број 112. На граѓаните им беше поделен и печатен едукативен материјал, изработен во соработка со ЈП „Национални шуми“ – информираа од МВР.
