Повеќе пари за пречистителни станици, водоводни и канализациони системи, изградба на дистибутивни центри за земјоделски производи, реконструкција на факултети. Ребалансот на буџетот изгласан од пратениците со 64 гласа „за“ и ниту еден воздржан или против. Капиталните инвестиции од 750 милиони евра главен двигател на растот во 2026-та. Ќе има за 14,5% повеќе пари за инфраструктурни проекти. Забрзано ќе се гради автопатот Кичево – Охрид и трите делници на конзорциумот Бехтел и Енка. Наредниот месец стартува автопатот Скопје – Блаце, а се работи и на пругата Бељаковце-Крива Паланка. Министерката за финансии задоволна од тоа како се полни државната каса. Повеќе пари има од данок на личен доход, добивка, ДДВ, неданочни приходи и донации. Поради кризата и воведените мерки, кај акцизите ќе има пад од 26 милиони евра.
Ребалансот е повеќе социјален, а помалку развоен, тврди опозицијата. Тие критикуваат и за порастот на дефицитот од 3,5 на 4,1%.
Пратениците од власта реплицираат дека голем дел од дефицитот е за враќање на стари долгови на СДСМ земени со повисоки камати. Поради нафтената криза, се очекува понизок економски раст од 3,8 на 3,5% и повисока инфлација од 2,5 на 4,5%. И покрај ова, тие велат дека Македонија останува земја со добри економски перформанси, најниски цени на горивата и стапка на инфлација.
Димитриеска Кочоска се обврзува на домаќинско трошење на буџетските пари. Се намалуваат ставките за стоки и услуги. Дополнителни задолжувања од првично планираните ќе нема, а ќе се направат и напори јавниот долг да не надмине 60% од БДП.
