Општина Битола има позитивен тренд во примената на системот за интегритет, соопштија од локалната самоуправа по добивањето податоци од ДКСК која ја следи примената на овој систем во македонските општини.
Од секторот за односи со јавност на Општина Битола информираа дека во извештајот на Државната комисија за спречување корупција за 2025 година, кај Општина Битола е забележан значаен напредок во делот на прифаќањето на политиката за интегритет и учествување во процесот на следење на примената на системот за интегритет.
– Во 2024 година општината беше валоризирана со 49,6 проценти исполнетост и сместена во категоријата „просечно”, а за 2025 година Општина Битола е валоризирана со 78,31 проценти исполнетост, со што преминува во категоријата „добро” и се позиционира меѓу општините со повисоко ниво на усогласеност со системот за интегритет. Податоците покажуваат дека кај Општина Битола има јасен позитивен тренд во примената на системот за интегритет. Напредокот од речиси 29 процентни поени укажува дека општината во периодот меѓу двата циклуса на следење презела активности за подобрување на усогласеноста со обврските што произлегуваат од Политиката за интегритет. Овој напредок е особено значаен затоа што во 2025 година поголем дел од општините сè уште се наоѓаат во категоријата „просечно” или „слабо”, додека Општина Битола преминува во повисока категорија и покажува поголема институционална зрелост во споредба со претходната година, соопштија од тамошната локална самоуправа.
Во рамки на соработката со Националниот демократски институт, преку проектот „Заедници со интегритет”, Општина Битола е дел од групата општини опфатени со активностите за јакнење на локалниот интегритет, а локално лице за интегритет од Општина Битола е назначена Цветанка Ристевска, чиј ангажман беше пофален од шефот на Мисијата на ОБСЕ во Скопје, амбасадорот Килијан Вал, нагласија од Општина Битола.
