Пред воопшто да почне 109. собраниска седница на барање на Левица, за еден час се одложи нејзиниот почеток.
Координаторот на Левица Борислав Крмов побара еден час пауза, поради како што рече, работите што се случуваат со Изборниот законик.
-Поради сите овие нечесни работи коишто ги прави власта, овие играрии што ги прави власта со Изборниот законик, јас барам пауза од еден час по член 87, став 2, рече Крмов.
Потпретседателот на Собранието Антонијо Милошоски кој ја води седницата ја одложи седницата, но исто така се заблагодари за конструктивното, како што кажа, учество на Левица во работната група за Изборниот законик.
-Навистина дадоа голем придонес и се надевам дека ќе продолжат во тој дух. Давам пауза од еден час, рече Милошоски.
Се очекува, на дневен ред на 109. седница денеска на предлог на пратениците да бидат ставени измените на Изборниот законик. Иако учествуваше во работната група, Левица одби да го потпише предлогот.
Освен новата 109. седница, денеска во Собранието се закажани и продолженија на четири други седници.
