Министерот за надворешни работи и надворешна трговија, Тимчо Муцунски, денеска оствари средба со Фернандо Мариано Сампедро Маркос, државен секретар за ЕУ во Министерството за надворешни работи, ЕУ и соработка на Шпанија.
Како што соопшти Министерството за надворешни работи и надворешна трговија, во фокусот на разговорите биле европската интеграција на земјава и актуелните случувања во процесот на проширување на Европската Унија.
Министерот Муцунски изразил благодарност за доследната и принципиелна поддршка од Шпанија за европската перспектива на земјата, како и за нејзината посветеност проширувањето да остане меѓу стратешките приоритети на Унијата.
Тој ја нагласил важноста од блиска соработка и координација со Шпанија во претстојните дискусии за иднината на политиката на проширување.
– Процесот на пристапување мора да остане кредибилен, предвидлив, еднаков за сите и заснован на заслуги, со јасна крајна цел – полноправно членство во ЕУ, паралелно со унапредувањето на практичните форми на постепена интеграција- истакнал министерот.
Воедно, тој го информирал соговорникот за резултатите од спроведувањето на Реформската агенда и за посветеноста на Владата кон доследно спроведување на европските вредности и стандарди на национално ниво.
Соговорниците ја потврдиле важноста од натамошно продлабочување на билатералната соработка во рамките на европските процеси, како и потребата од зачувување на кредибилитетот на политиката на проширување и забрзување на пристапниот процес на земјата.
