Собраниската Комисија за одбрана и безбедност ја проследи на натамошна постапка предлог-одлуката за испраќање на припадници на Армијата за учество во меѓународната операција на Организацијата на обединетите нации УНИФИЛ во Република Либан.
За учество во меѓународната операција на Организацијата на обединетите нации УНИФИЛ во Либан се испраќаат двајца припадници на Армијата за период од шест месеци, сметано од август 2026 до февруари 2027 година.
Подготовките и организацијата на припадниците на Армијата за учество во меѓународната операција ги врши Министерството за одбрана.
Заменик-министерот за одбрана Адмир Шабани истакна дека се работи за стандардна одлука, која е донесена врз основа на членот 41 став 1 од Законот за одбраната. Двајцата членови на активниот воен персонал, припадници на резервните сили на Армијата, се испраќаат во операции за кризен менаџмент и кооперативна безбедност, надвор од територијата на републиката. Потенцира дека финансиските трошоци за транспорт, плати и надоместоци на плати и логистичките трошоци на припадниците на Армијата за учество во меѓународната операција ги обезбедува Министерството за одбрана. Тој посочи дека се работи за ротација бидејќи, како што рече, ние и порано имавме припадници во оваа мисија.
