Еднократна парична помош и годинава ќе добијат новозапишаните првоодделенчиња, учениците кои ќе започнат прва година средно образование, студентите запишани на државните универзитети, како и семејствата со новороденчиња во општина Карбинци.
Градоначалникот на општина Карбинци, Виктор Паунов, на денешната прес-конференција рече дека за учениците и студентите поддршката изнесува по 5.000 денари, додека за новороденче се предвидени 10.000 денари.
– Овие средства ги зголемивме од претходната година. Претходно беа во висина од 3.000 денари, а веќе планираме од следниот буџет оваа мерка да достигне до 8.000 денари по ученик и една исто така важна мерка до родителите кои што добиваат принова или новороденче имаат можност од општина Карбинци да добијат 10.000 денари еднократна помош. Ова го говорам во пресрет на месец септември, во коj што ќе започне учебната година, ќе започнат и оние трoшоци и затоа се важни овие мерки – изјави Паунов.
Покрај помошта за учениците и семејствата, од септември во Карбинци ќе стартува и нова мерка за субвенции за пелети за огрев. Од општината најавуваат дека со ова ќе им се помогне на граѓаните полесно да ги покријат трошоците за греење во претстојната сезона. Очекувањата се дека овие мерки ќе им помогнат на дел од семејствата полесно да се справат со трошоците од септември.
