Правото на користење на апаратот за стрес-тест, a со години сметстен во амбулантата за Спортска медицина при ЦЈЗ во Прилеп, ги скара лекарот-специјалист д-р Гоце Јонзоски и директорката на Болницата, Кети Смилеска. Распаравијата кулминирала со насилничко однесување на двајца вработени во Болницата врз докторот, а во присуство на директорката, вели д-р Јонзоски.
„Иако многу пати се договоривме дека апаратот не треба да се одземе, туку да биде тука, таа продолжуваше со заканите. Кога дојдоа двајцата насилници, по нејзин налог, тие ме фатија на сила. Јас, сите видливи повреди што ми ги нанесоа ги евидентирав во медицинска документација. Значи, ова е лудило“, ни рече за Алфа, видно вознемирен д-р Гоце Јонзоски.
Јонзоски тврди дека во Интерното одделение има Стрес-тест апарат, но тој со години бил расипан, па директорката сега се обидувала вака, со одземање на други апарати да се пофали дека се грижи за пациентите.
„Проблемот е што апаратот на Интерно одделение му бил расипан повеќе од 10 години. Јас не видов дека има писмено барање од тој началникот на Интерно, тој Златко Савоски, што и тој глуми голем мангуп дека ќе ме решел мене“, – објаснува Јонзоски.
Директорката на Болницата пак, Кети Смилеска, денеска на прес-конференција се пофали дека за Интерното одделение бил обезбеден апарат за стерс-тест, без притоа да го спомене инцидентот. Одговарајќи на прашањето на Алфа, таа демантираше дека имало физичка пресметка.
„Да, бев присутна во својство на работодавач, заради тоа што вработените коишто требаше да го дислоцираат апаратот, добија од мене налог врз основа на Одлуката на стручниот колегиум. Но, беа спречени од докторот по спортска медицина да се реализира тој налог“ – рече Кети Смилеска, директорка на Општа болница – Прилеп.
Нападнатиот доктор, освен што извадил медицински потврди за нанесените повреди, случајот го пријавил и во Полиција и вели дека правдата ќе ја бара на Суд, бидејќи се сомнева и во политичка позадина на настанот.
Каролина Дурло
