Полициската академија ќе им даде соодветна обука на идните млади полициски службеници за борбата со организиран криминал. Ќе добијат и најнови меѓународни знаења, искуства и нови методи за работа како резултат на зајакнувањето на соработката меѓу Македонија и Интерпол. Со размена на експерти и обучувачи, нови наставни програми, организација на семинари и работилници, полицијата поефикасно ќе се справува со современите закани.
„Веруваме дека ваквата соработка ќе придонесе за создавање нови можности за академски и професионален развој, унапредување на меѓународната полициска соработка и подготовка на нови генерации на полициски службеници способни ефикасно да одговорат на современите безбедносни предизвици“– вели Влатко Митковски, раководител на центарот за обука при МВР.
Од Интерпол велат дека технологијата и вештачката интелегенција секојдневно го менуваат дејствувањето на криминалните мрежи, па поради тоа, соодветната обука е од големо значење. Извршниот директор ги охрабри кадетите да не се откажуваат – иако професијата бара голема одговорност, носи и чувство на исполнетоств во служба на татковината.
„Интерпол високо ја цени активната вклученост на македонската полиција во нашите глобални операции и иницијативи. Современите закани бараат меѓународен одговор, а Северна Македонија е доверлив партнер кој покажува професионалност, посветеност и подготвеност да придонесе во заедничката борба против транснационалниот криминал. Ќе продолжиме заедно да ги јакнеме капацитетите, да ја унапредуваме размената на информации и да инвестираме во новите генерации полициски професионалци“, истакна генералниот секретар на Интепрол, Валдеси Уркиза.
Инаку, по 26 години повторно се враќа и средното полициско училиште. Првата генерација на 200 ученици, од септември ќе престојува во интернат во Идризово каде што ќе има обуки и предавања. Условите за упис вклучуваат добро здравје, психофизичка способност и најмалку „добар“ успех. По успешното завршување на школувањето, МВР ќе им обезбеди на матурантите работно место како полицајци.
