Општина Маврово и Ростуше го заврши проектот за изградба на нов резервоар за вода за пиење во селото Ростуше, со што, според локалната самоуправа, е решен долгогодишен проблем со водоснабдувањето.
Од Општината информираат дека новиот резервоар е изграден согласно современите технички и хигиенски стандарди и ќе овозможи поголем капацитет, повисок притисок и постабилна дистрибуција на вода, особено во периодите кога потрошувачката е најголема.
-Со реализацијата на овој капитален проект значително се подобрува квалитетот и сигурноста во снабдувањето со вода за пиење за жителите на Ростуше- наведуваат од Општина Маврово и Ростуше.
Локалната самоуправа посочува дека продолжува со реализација на капитални инфраструктурни проекти во сите населени места, со цел рамномерен локален развој и подобрување на условите за живот на граѓаните.
Изградбата на резервоарот е финансирана со средства обезбедени преку вториот повик за проекти од унгарскиот кредит. Тогаш оваа општина доби четири проекти во вредност од 58.920.834 денари, од кои Владата финансира средства во висина од 41.861.205 денари а Општина Маврово и Ростуше ќе кофинансира средства во висина од 17.059.629 денари.
