Во Општина Пехчево официјално започна реализацијата на проектот за реконструкција на улиците „Илинденска“, „Мирче Ацев“ и „Даме Груев“, како и нивните краци, со воведување во работа на изведувачот на градежните активности.
Од Општина Пехчево информираат дека проектот, покрај реконструкцијата на коловозите, опфаќа и изградба на нова атмосферска канализација, со што ќе се подобри одведувањето на дождовните води, ќе се зголеми безбедноста во сообраќајот и ќе се создадат подобри услови за движење на граѓаните.
Според локалната самоуправа, со реализацијата на проектот ќе се надмине долгогодишниот проблем со задржување на атмосферските води на овие сообраќајници, што ќе придонесе за подолг век на коловозите и поквалитетна урбана инфраструктура.
Градоначалникот на Пехчево, Александар Китански, истакна дека станува збор за уште една значајна капитална инвестиција која, како што рече, претставува вложување во идниот развој на општината.
– Реконструкцијата на овие улици, заедно со изградбата на атмосферската канализација, не е само инвестиција во патната инфраструктура, туку и во иднината на нашиот град. Со ваквите проекти создаваме побезбедни улици, подобри услови за секојдневното функционирање на граѓаните и поквалитетна комунална инфраструктура која ќе служи со децении, изјави Китански.
Од Општината упатија и апел до жителите на улиците „Илинденска“, „Мирче Ацев“ и „Даме Груев“ во рок од осум дена да ги отстранат градежните материјали, дрвата за огрев, хаварисаните и нерегистрирани возила, комуналниот и кабастиот отпад, приколките, механизацијата и другите предмети поставени на тротоарите, коловозите и јавните површини, со цел градежните работи да се одвиваат непречено и во предвидените рокови.
Од локалната самоуправа изразија уверување дека соработката и разбирањето од страна на граѓаните ќе придонесат проектот да биде реализиран квалитетно и навремено, со што ќе се подобрат условите за живот и ќе се унапреди комуналната инфраструктура во Пехчево.
