До 15% поефтин училишен прибор во сите книжарници во пресрет на почетокот на учебната година. Нацрт одлуката за училишната кошничка е готова, а во вторник треба да се усвои на владина седница. Во консултации со трговците на мало и на големо државата и оваа година ќе им помага на родителите да заштедат на основните потреби. Моливите, ранците, гуми, тератки, хамери, шестари, калкулатори, боици, острилки ќе бидат јасно обележани, а попустот до 15 проценти кој важи за секој обележан производ ќе се пресметува на каса.
„Согласно предлогот, ќе се понуди училишна кошничка до 15% попуст , а составот и крајната цена на кошничката ќе се разликува од трговец до трговец, во зависност од изборот, квалитетот и брендот на производите.
Кошничките ќе бидат јасно означени и поставени на видно место, со прецизно наведен состав и цени на производите. На овој начин, родителите однапред ќе имаат целосна информација за тоа што ќе содржи пакетот и која ќе биде неговата цена.“- велат од Министерството за економија и труд.
Во вторник се очекува да биде донесена одлука со која би се опфатиле најпотребните производи за почетокот на учебната година, со намалени цени. Оваа мерка се применуваше и во изминатите две години.
„На следната владина седница во вторник ќе донесеме одлука за формирање училишната кошничка. И мислам дека во рамките на можностите сето тоа ќе биде атрактивно за родителите и за учениците.“- вели премиерот Христијан Мицкоски.
Пресметката што ја направи Алфа покажува дека во моментов без попустот за почеток на учебната година родителите треба да потрошат и до стотина евра за едно дете. Трошоците се поголеми ако тоа е прваче. Ранците сега се продаваат од илјада до четири или пет илјади денари, тетратките чинат од 15 па до 650, гумите 15 до 100, а боите и фломастерите од 100 па нагоре. Најефтините боички чинат 45 денари, додека најскапите се по 250 денари. Готови комплети од ранец, несесер и торба за ужина се продаваат по 3000 денари.