Дневна евтина тарифа од 11 до 15, а не како до сега од 13 до 15 часот. Пониска цена цел викенд, а не како до сега само во недела. Ова се опциите кои ги разгледува Регулаторната комисија за енергетика а кои би можеле да почнат да важат веќе од следната година. Надлежните велат дека се разгледуваат промени за граѓаните да добијат пониски сметки, а и подобро да се искористи прозиводството од обновливи извори.
„Факт е дека има еден убав период од 11 до 15 часот во кој берзанските цени се многу ниски затоа што имаме вишок на енергија. Во тој распон можеби ќе се движиме со зголемување на периодот на поевтина електрична енергија, а за разлика од тоа можеби ќе има намалување во ноќните часови“, изјави Ацо Ристов – претседател на Регулаторната комисија за енергетика, водни услуги и услуги за управување со комунален отпад (РКЕ).
На ЕВН нема да им биде потребно многу време за прилагодување на броилата доколку се воведат новите тарифни модели. Најголемиот дел од броилата се дигитални, па промените во тарифите може релативно брзо да се имплементираат.
„Сакаме на време да го изодиме процесот и ако се решиме за промени да им оставиме период од најмалку еден месец за да можат во отчитувањето после Нова година и тие да имаат нова платформа и пресметка за испорачана електрична енергија, промена на софтвер во броилата“, Ацо Ристов – претседател на Регулаторната комисија за енергетика, водни услуги и услуги за управување со комунален отпад (РКЕ).
Од РКЕ нагласуваат дека сè уште не е донесена конечна одлука и дека во тек се детални пресметки за да се утврди дали предложените измени ќе донесат реални заштеди.
Математиките ќе треба да покажат и дали новите тарфифи ќе важат во текот на целата година или пак за одреден период, како на пример од мај до септември кога има многу сонце.
Пред евентуалното воведување на новите правила, ќе се организира јавна расправа и консултации со сите засегнати страни.
