Кипарскиот филм „Држи се за мене“, кој го отвори петтото издание на Фестивалот „Преку езерото“, ја доби Гран при наградата за најдобар филм на Медитеранот. Одлуката на вчерашното свечено затворање на фестивалот ја соопшти меѓународното жири, составено од тројца членови – Мирослав Митиќ – српски продуцент, Елеонора Венинова – македонска режисерка и Емили Ришел – француска филмска програмерка.
- „Ова е толку голема чест, многу сум благодарна. Сакам да му се заблагодарам на програмскиот тим што го селектира филмот за да го прикаже пред публиката во Македонија. Секако, и на жирито што ни ја додели наградата, тоа многу ни значи “- изјави во своето видеообраќање режисерката на „Држи се за мене“, Мирсини Аристиду.
Специјално признание од Советот на фестивалот доби иранскиот филм „Коцкарот“ за исклучително креативно достигнување и вонредни продукциски околности, издржливост и посветеност, остварени во особено тешки продукциски услови за време на актуелната војна во Иран.
За најдобра кинематографија на медитерански филм, меѓународното жири му ја додели наградата на Душан Кардалевски за филмот „Кома“.
- „Голема благодарност до Агенцијата за филм, која ни овозможи да го снимиме филмот, исто така до селекторот на фестивалот, кој го донесе филмот овде да се прикаже, до целата организација на Фестивалот. Оваа награда не е само моја, тука на целата екипа и секако на режисерот на филмот, Агим Абдула“ – рече Кардалевски.
Гостинот на Фестивалот од Белгија, Јаник Рение, се закити со признанието за најдобар актер за улогата во филмот „Одразот во мртвиот дијамант
- „Навистина е неочекувано да добијам награда за најдобар медитерански актер кога доаѓам од областа на Северното Море, но сепак беше уникатно искуство да се игра во овој филм и затоа многу ви благодарам за наградата“ – рече Рение.
Наградата за најдобар режисер на Медитеранот ја понесе српскиот режисер Александар Радивоевиќ за „Кармадона“. Специјално признание му се оддаде и на филмот „Чекајќи го возот“ од Словенија, а најдобар медитерански краток филм беше „Антигона“ на Ибер Деари и Мирсад Абази.
Директорот на Фестивалот, Јани Бојаџи очекува уште поголема поддршка следната година бидејќи според него „Преку езерото” пополнува 35-годишна празнина во културно-уметничката понуда на југоистокот.
- „Ние не можеме да развиваме туризам ако не понудиме содржина. Да си поставиме прашање: Што ќе остане од градот Охрид ако го исклучиме фестивалот Охридско културно лето? Нема да остане ништо. Значи, во Охрид 66 години се вложуваат милиони евра и се носат најголемите уметници од целиот свет за да заживее Охрид како културно средиште. Сега е ред и овој дел од Македонија да го добие својот дел, општеството да инвестира во развојот на културни, уметнички содржини, ако воопшто имаме идеја да развиваме туризам, а тука и немаме што друго да развиваме“ – вели Бојаџи – Директор на „Преку езерото“.
Петото фестивалско издание, кое траеше од 8 до 15 јули во Дојран,Струмица и Гевгелија, го затвори градоначалникот Илија Тентов.
