– Од Иванден (7 јули) до Петровден (12 јули), во манастирот „Св. Јован Претеча“ во Слепче ќе се одржи Демирхисарската летна школа, една од најзначајните научно-образовни иницијативи во земјава, посветена на истражувањето, заштитата, валоризацијата и промоцијата на македонското културно наследство.
Демирхисарската летна школа е простор во кој академската наука непосредно се поврзува со локалната заедница. Нејзината основна мисија е преку теренски истражувања, научни предавања и јавни трибини да придонесе за подобро познавање, вреднување и зачувување на движното и недвижното културно наследство, најавија организаторите во пресрет на официјалниот почеток на школата.
Во програмата ќе учествуваат еминентни научници и истражувачи и таа опфаќа научно-истражувачки теренски активности, посети на значајни археолошки, историски и духовни локалитети, стручни работилници и јавни предавања од областа на археологијата, историјата, историјата на уметноста, архитектурата, конзервацијата и теологијата.
