Двете штипски градинки, „Астибо“ и „Вера Циривири-Трена“, административно ќе се спојат во еден правен субјект, за оваа одлука денеска гласаа мнозинството советници во Советот на општина Штип. Градоначалникот на општина Штип, Иван Јорданов образложи дека градинките ќе продолжат да работат во истите објекти и клонови, а за децата и родителите нема да има никакви промени. Јорданов вели дека нема да има отпуштања на вработени, туку ќе се менува само начинот на организација. Целта е да се намалат трошоците и градинките да работат поефикасно.
-По одлуката за оптимизацијата на трошоците во основното и средното образование во општина Штип, одлучивме истото да го направиме и во згрижувачката дејност, односно кај детските градинки. Поточно за јавноста, сакам да ебалорирам што значи тоа. Во моментот на територија на општина Штип имаме два правни субјекти, две градски градинки и неколку клонови, односно згради, каде што се врши згрижувачката дејност. Со оваа одлука остануваат истите клонови, практично дечињата, родителите не се засегнати, туку се прави спојување административно. Од две правни лица во едно правно лице- изјави Јорданов.
Штипскиот градоначалник посочи дека наместо два управни одбора или два директора, наместо двајца сметководителите, наместо две кујни, со спојувањето на двете градинки ќе има по една кујна, потоа по еден директор, управен одбор,благајкник, со цел намалување на трошоците.
-Овде не се засегнати ниту вработените, никој од вработените нема да остане без работа, туку стратегијата на среден рок е како ќе се пензионираат веќе постоечките вработени, внатрешно да се реорганизираат и да нема внесување на нови вработени на веќе испразнетитите или во иднина испразнетите работни места. Со тоа ќе се намалат трошоците, кои ги имаме во рамки на згрижувачкиот процес, детските градинки, ќе се зголеми продуктивноста и оптимизацијата-вели Јорданов.
