На есен Грција се очекува да биде домаќин на состанок на групата „Пријатели на Западен Балкан“, а исто така на есен, министерот за надворешни работи Јоргос Герапетритис ќе ја продолжи посетата на земјите од регионот – кандидатки за членство во Европската Унија, брифираат високи грчки дипломатски извори.
Активностите се во пресрет на грчкото претседателство со Европската Унија во втората половина на 2027 година и во тие рамки Герапетритис минатиот месец беше во Србија, Црна Гора и Босна и Херцеговина, а планирано е да ги посети и останатите земји, меѓу кои и нашата, што веројатно ќе се случи на есен.
За европската перспектива на Западен Балкан, грчките извори посочија дека Атина инвестира во овој процес и е во редовен контакт и со високата претставничка на ЕУ за надворешна политика и безбедност Каја Калас и со еврокомесарката за проширување Марта Кос.
Дополнително, нагласија дека во изминатите години постои напредок во процесот на проширување, но и дека европските органи веќе ја препознаваат неопходноста да напредува проширувањето со земјите од Западен Балкан.
За време на грчкото претседателство со Европската Унија, потсетија дипломатските извори, една од земјите од регионот, односно Црна Гора, се очекува и официјално да стане членка на Унијата.
Ставот на официјална Атина е дека местото на Западен Балкан е во ЕУ, дека Грција го поддржува овој процес, но и дека е земјата што ја забрзува европската перспектива.
