Со расчистување на теренот, подготовки на површините и оформување на патеките и останатите планирани содржини почна изградбата на нов парк во Струмица, во населбата „Карпош“, објавија од Општината.
-Овој нов парк опфаќа вкупна површина од 14.000 квадратни метри. Ќе има хортикултурно уредување со засадување на голем број дрвја, грмушки и ароматични растенија, претежно автохтони видови, тревни површини, заштитно рабно зеленило, костенова шумичка, јадлива шумска дендрофлора и разновидно парковско зеленило, создавајќи простор што ќе биде убав, функционален и отпорен на климатските предизвици, се наведува во објавата на локалната самоуправа.
Се додава дека проектот е дел од пошироките активности за намалување на загадувањето на воздухот и подобрување на урбаната животна средина преку зголемување на зелените површини – „Справување со загадувањето на воздухот“, финансиран од Амбасадата на Шведска во партнерство со Министерство за животна средина и просторно планирање и Општина Струмица и е дел од Програмската рамка на УНДП, којашто е финансирана од Шведска, а го вклучува и проектот „Јакнење на општинските капацитети за имплементација на проекти“.
