Монашкото братство на Бигорскиот манастир, во соработка со Црвениот крст и Институтот за трансфузиона медицина, денеска реализира крводарителна акција под мотото „Дарувај крв, спаси живот“.
– Дрнеска имавме уште една успешна крводарителска акција во Бигорски. Да ја даруваат драгоцената течност што живот значи се пријавија над 70 лица, а ја даруваа 66, останатите поради оправдани причини не можеа да го сторат тоа, изјави за МИА архимандрит Кирил, по дарувањето на драгоцената течност.
Особено сме радосни, додаде, што меѓу оние кои подадоа рака и даруваа крв, освен членови од братството, имаше и лица од разни места, разни националности и вероисповеди.
Тој упати голема благодарност до крводарителите и до оние кои помогнаа во спроведување на акцијата, за нивната хуманост, добра волја и успешната соработка, додавајќи дека секоја капка крв значи надеж за некого.
Ова беше втора крводарителна акција, по онаа во ноември минатата година, но како што велат оттаму, нема да биде последна.
