ДУИ и СДСМ прават се за да ја задржат коалицијата со Алијанса на Албанците. Владата го повлече на доработка законот со кои американската и британската црна листа требаше да станат дел од домашниот правен поредок.
Коалицијата најверојатно потклекна под притисоци, бидејќи Министерството за правда даде негативно мислење, а таму на чело седи Кренар Лога од редовите на Таравари.
Министерот ја поздравува одлуката на Владата за повлекување на законот… со оглед на тоа што Министерството укажа на низа законски пропусти во предложеното решение, велат од Министерство за правда.
Од Алијанса не признаваат дека правеле притисок но повторуваат дека се на ставот дека законот во таква форма каква што беше предложен не смеел да биде донесен.
Немаме извршено некое влијание или притисок и не функционираме на тој начин. Алијансата за Албанците стои во иста линија со ставот на Министерот за правда, велат од Алијанса за Албанците.
Дека се прават внатрекоалициски комбинаторки покажуваат и измените на законот за администрација, кои доаѓаат на предлог на Министерството за информатичко општество со кое раководи Азир Алиу од Алијанса кои пак се туркаат во Собранието и покрај силниото противење на синдикатите и критиките дека предлогот не е во согласност со европските стандарди.
Минатата недела Алиу се закани дека ќе си поднесе оставка доколку не бидат усвоени три закони кои ги подготвил тој.
Инаку Алијанса за Албанците иако во моментов е дел од владината коалиција се уште нема одлучено како ќе настапи на претстојните избори.
Се повеќе се подгреваат шпекулациите дека Таравари сака да оди во коалција со Меџити, Касами и Гаши, но Ахмети и Груби прават се што можат да го задржат крај нив.
Дека Таравари си влече страна настрана од ДУИ покажува и фактот што тој се среќава и јавно со Европскиот Сојуз за промени, но и со косовскиот премиер Кутри кој својата поддршка ја дава на Меџити, Гаши и Касами.
