Прометот од продажбата на услугите е зголемен за 0,3 проценти во четвртото тримесечје од 2025 година во однос на истото тримесечје од претходната година, објави денеска Државниот завод за статистика.
Во четвртиот квартал лани споредено со истиот квартал од претходната година најголемо зголемување на прометот во услугите од 3,8 проценти има во секторот Стручни, научни и технички дејности и од 3,4 проценти во секторот Административни и помошни услужни дејности.
Податоците на ДЗС покажуваат дека во 2025 година во однос на 2024 година прометот од продажбата на услугите е зголемен за 0,6 проценти. Во секторот Административни и помошни услужни дејности годишното зголемување изнесува 4,8 проценти, по што следуваат Објекти за сместување и сервисни дејности со храна од 3,8 проценти, Стручни, научни и технички дејност 2,5 проценти и Дејности во врска со недвижен имот 1,7 проценти. Намалување од 1,5 проценти има во Информации и комуникации, кај Трговија на големо и трговија на мало; поправка на моторни возила и мотоцикли од 1,3 проценти и од 0,4 проценти во Транспорт и складирање.
