Земјотрес со јачина од 4,7 степени според Рихтеровата скала синоќа ги вознемири жителите на Скопје, Тетово и Гостивар. Земјотресот е регистриран во 22:05 часот по локално време. Епицентарот бил лоциран на околу 20 километри југоисточно од Призрен, во близина на границата со Македонија.
Засега нема информации за причинета материјална штета или повредени лица. Во текот на ноќта регистрирани се повеќекратни земјотреси и во Турција и во Грција.
Редовниот професор на Институтот за географија, Ивица Милевски, смирува дека нема простор за загриженост, посочувајќи дека земјотресите се дел од природни и долготрајни геолошки процеси.
„Ништо страшно. Немирната Шар Планина уште се издишува, макар можеби само за десетина милиметри одеднаш, што и не е малку. Нека си тера таа како што тера со милиони години, малку по малку, а ние може да си одмориме“, напиша Милевски.
