Здравството се поместува од мртва точка – најави за повеќе пари за матичните, но и мерки да опстанат амбулантите во селата

Најавата за зголемување на капитацијата по пациент, поблаги казни и финансиска мотивација за лекарите е огромен чекор напред во примарното здравство оценуваат матичните доктори. Тие ги поздравија најавените мерки од ФЗОМ за реформи во матичните амбуланти. Според д-р Бојан Трајковски ова е позитивен сигнал, дека здравствениот систем мрднува од мртва точка.

Сепак, делот кој предвидува руралните амбуланти да може да работат само со матичен доктор, и според лекарите и според медицинските сестри е тешко остварлив. Предлагаат наместо ова, да се размисли за субвенционирање на нивните плати.

Сегашниот предлог на ФЗОМ е матичните лекари во населени места до 2,000 жители да можат да работат и без медицинска сестра како преодно решение во наредните две години. Покрај капитацијата за секој пациент, лекарите во малите места ќе добиваат и бонус од 22.500 денари месечно.
Договорено е формирање на работни групи за зголемување на капитацијата по пациент која сега изнесува 75 денари. Докторите бараат да добиваат по 100 денари, а од ФЗО велат дека ќе ги разгледаат сите можности за повеќе пари, но и за ублажување на казните.