Здравствените работници со големи очекувања од новиот владин состав. Откако власта во заминување им остави еден куп нерешени проблеми, фокусот го насочуваат кон идниот состав во кој гледаат надеж дека работите можат да се променат. Незадоволството и револтот е огромен а синдикатите кои ги претставуваат, велат дека само минатиот месец и тоа само од една скопска болница, ГОБ 8 ми септември, си заминале 15тина медицински сестри и технички персонал. Па кога би се земале во предвид и другите здравствени установи, како и изминатите месеци, веројатно станува збор за фрапантна бројка. Здруженијата и синдикатите алармираат дека на македонското јавно здравство му се случува егзодус, па приоритет на новата влада треба да бидат вработените во овој сектор, особено оние кои со години работат без здравствено и пензиско осигурување.
- „Го чекаме назначувањето на новиот министер, да се договориме за ситуацијата за приватните доктори и за вработените во јавното здравство. Очекуваме позитивна клима од нивна страна дека ќе се реши овој проблем, бидејќи тие луѓе, 5 до 6 години работат за 21.000 денари. Тоа е срамно и жално. А држат цели одделенија во јавното здравство. Примарна медицина, вакцинација, лабаратории, физикални, и тн…“ – Изјави Боби Бојчевски од независниот синдикат на здравствени работници.
Лекарската фела веќе одамна бара политики и систем кој ќе биде заснован на реалните потреби на пациентите и медицинскиот персонал. Тие од новиот состав на владата очекуваат темелни реформи, а не брзи ад-хок решенија како што се случуваше досега.
- „Во примарното здравство натрупани се проблемите, постои казнена политика, која што ја нема во ниту еден друг ресор или друг сегмент во здравството. Очекуваме од новиот министер за здравство сериозно да зафатиме за проблемите. Да ги смениме законите, да бидат во интерес на граѓаните“ – Изјави Лилија Џолакова Дервишива, од здружението на матични лекари.
На заедничката пресконференција, здруженијата и синдикатите на здравствените работнци го промовираа меморандумот за соработка, како и новите претседатели на првите луѓе на синдикатот, откако претходните си заминале во приватните клиники. Додека пак за најголем дел од здравствените кадри, синдикатите велат дека најчесто си заминуваат во Словенија, но и други европски држави.
Никола Цветкоски
