Македонија е подготвена да ја преземе обврската како полноправна членка да го даде својот придонес за менување на мултидимензионалните безбедносни предизвици што стојат пред НАТО. Премиерот Заев на Самитот на НАТО во Лондон повтори дека Македонија ќе стори се за да го зголеми буџетот за одбраната до 2 проценти од БДП како што бара Трамп, до 2024 година при што главен дел од овие пари е се одвојуваат за модернизација на армијата.
Заев, на чело на владина делегација присуствува на Самитот на НАТО во Лондон, седи на иста маса со претставниците на земјите членки, но нема право да гласа заедно со сојузниците. Тој на фејсбук порача дека македонската иднина со вакви сојузници е гарантирана и дека Македонија е 30-та членка на НАТО што носи просперитет за сите наши граѓани. Сепак, Mакедонија се уште не е членка бидејќи Шпанија доцни со ратификацијата на протоколот, а за да не се случи не сакано сценарио според кое власта би ги одложила изборите на 12 април, опозицијата, и македонската и албанската, побара, Собранието да не ја чека Шпанија и пратениците да го изгласаат протоколот за влез во НАТО веќе на наредната седница.
Спикерот Џафери пак, порачува дека иницијативата за ратификација на членството во НАТО ВМРО-ДПМНЕ не треба да ја достави во Парламентот туку треба да ја испрати до Владата.
Претседателот Пендаровски од своја страна синоќа изрази став дека во случај Шпанија да задоцни и да го ратификува Протоколот за членство во предизборниот период, не би било проблем тој во македонското Собрание да биде потпишан по изборите и конституирањето на новиот собраниски состав.
Драган Милосављевиќ
