Над 400 жители од прилепското село Беровци се плашат дека ќе останат без своите обработливи земјоделски површини од кои егзистираат со вкупна површина од околу 30 хектари. За контраверзната изградба на новиот автопат Прилеп-Битола од Коридорот 10Д, на нивните имоти требало да никнат асфалтни и бетонски бази, како и кампови за работниците кои во следните најмалку пет години ќе работат на оваа делница. Гневни и лути, месните жители денеска излегоа на протест, а ангажирале и адвокати, преку кои доставиле и петиција до сите надлежни државни институции.
„Приватното земјоделско земјиште кое „Бехтел и Енка“ го одзема не се наоѓа ниту на трасата на предвидениот автопат, туку е на околу еден километар од предвидената траса. Очекуваме надлежните државни институции и ЛС да реагираат во насока на корекција на овој апсурд во најава. Ние понудивме конкретно решение, затоа што во непосредна близина има неискористени огромни парцели на државно земјиште и без притоа да има потреба државата да води постапки за експропријација и да плаќа надоместоци за експропријација“, – рече Ангела Ѓеорѓиески, правен застапник од АК „Топчиоски“.
„Ние не знаеме што ќе се случи со ова население доколку се одземе земјата. Никој не не’ информира од државата, туку не’ информира „Бехтел и Енка“. Не’ повикуваа еден по еден да не’ кршат како сламки, а државата не реагира“, реагираат мештаните и додаваат дека очигледно некој сака земјата да им ја земе за џабе, а и да ги разболи.
„На 500 метри до населеново место да имаме асфалтна база, да имаме бетонска база, тоа значи рак за ова населние. Овој пат најверојатно ќе се гради 10 години. Ова е страшно“, кажа Петре Ристески од с. Беровци.
„Со грдна пот е спечалено и да ни го одземат сега ?! Значи, одовде живее цело село. Значи децава мои, од другиве, жито, пченица, пиперки, компир, значи производството ако ни го одземат, нека ни земат и деца, и фамилии, и се’ нека ни земат и ќе не’ остават на улица“, – посочи Киро Јанчески од с. Беровци.
Според информациите до кои дојде Алфа, веќе во наредната недела треба да се одржи средба во ЛС Прилеп со претставниците од „Бехтел и Енка“, со цел изнаоѓање на решение.
Колку за потсетување, автопатската делница од Коридорот 10Д треба да биде готова за 57 месеци и според пресметките, за 39,3-те километри, по цена на чинење од 12 милиони евра од километар, таа би чинела околу 472 милиони евра, а за која засега, нема ниту конечен проект, ниту означена траса, ниту пак се знае до каде е експропријацијата на земјиштето во плодната Пелагонија.
Каролина Дурло
