Се уште не е завршена дигитализацијата на матичните книги и покрај тоа што започнала пред повеќе од една деценија, а во неа се вложени 8,5 милиони евра. Граѓаните во 21 век се уште добиваат изводи издадени на машина за пишување.
Ова го покажува извештајот на Државниот завод за ревизија, во кој се потенцира дека досега се скенирани само 52 проценти од записите во матичните книги на родени, умрени, венчани, а во електронскиот матичен регистар внесени се едвај 49 проценти од записите. Според ДЗР, недостатокот на јасна стратегија, контролни механизми и квалификувани човечки ресурси, го оневозможуваат подобрувањето на услугите за граѓаните и го зголемуваат ризикот од злоупотреби на лични податоци и губење на архивскиот материјал од трајна вредност.
