Викендов во Македонија ќе се одржи вториот по ред Европски Јуниорски Џудо Куп – Скопје 2024. Натпреварите ќе се одржат од 09 до 11 август во салата Јане Сандански во Аеродром.
Заради одличната организација и највисоките оценки кои ги добивме како национална џудо федерација, од страна на Европската Џудо Унија, Македонија повторно ја има можноста да биде домаќин на уште еден настан од највисок меѓународен спортски ранг.
„Ова е втор европски јуниорски куп, лани го имавме првито јуниорски куп. После подолго лобирање во Европската џудо унија, ни беше дадена таа доверба и успешно ја направивме организацијата“, рече претседателот на македонската џудо федерација Владимир Трпановски.
Потпретседателката на Европската Џудо Унија, Катерина Родригез која за првпат е во Македонија рече дека е задоволна од тоа како досега течеле подготовките.
„За првпат сум во Македонија и за првпат учествувам на Јуниорски куп во Џудо во Македонија воопшто. И воглавно сум тука дојдена да ги проверам протоколите и сите работи кои ќе се случуваат во врска со организацискиот дел. Досега сум задоволна од се што видов и утре ќе биде главниот момент да се потврди моето доаѓање за што сум дојдена тука“, рече потпретседателката на Европската Џудо Унија, Катерина Родригез.
На Купот досега се пријавени вкупно 269 учесници од 26 земји, од кои 163 во машка и 106 во женска конкуренција.
Најбројна е селекцијата на Грција која брои 27 натпреварувачи и натпреварувачки. Најмногу џудисти се од Грција 19, додека со најголем број џудистки ќе се натпреварува Турција.
Македонија има вкупно 19 члена, десет во машка и 9 во женска конкуренција, кои ќе бидат предводени од селекторот Александар Фузевски.
Љубиша Владимиров
