Болницата за белодробни заболувања во тетовски Лешок, која досега функцираше самостојно, сега заминува под капата на тетовскиот клинички центар. Владата во заминување реши во последен момент да прави реорганизација на оваа здравствена установа, со цел таа да дојде под контрола од тетовската болница. Сомнежите во јавноста се дека со овој потег ќе овозможи полесно вработување под партиски клуч и со етнички мотиви. Вработените се спротивставија на оваа одлука и побараа техничката влада, која не сноси политичка одговорност, да не одлучува за нивните судбини.
- „Зошто Министерството за здравство со сите свои министри до сега не направија план за вработување на кадри, специјалисти, не дадоа дозволи за специјализации и програма, иако секоја година добиваа извештаи? Бараме да се донесе кадар, доктори, специјалисти, за да продолжи нормално функционирање на болницата. Барањето од министерот Демири, поврзано со нашата болница итно да се поништи, да не се даде на следна владина седница. Бидејќи за 8 години, ако не се најде решение, ќе се најде за две недели? Вработените не се согласуваат било која одлука со која ќе биде на штета на болницата. Оваа болница работи 50 години самостојно. Не треба да се приклопуваме кон ниту една болница.“ – Порача Валентина Зафировска од синдикат на болница за белодробни заболувања во Лешок.
Во телефонски разговор за Алфа, директорот на болницата во Лешок, Исмаил Ваити, вели дека им недостасуваат доктори специјалисти. Тврди дека имаат буџет за нови вработувања но не добиваат амин од Влада за тие да се спроведат. Тој побарал решение за овој проблем, а од Министерството за здравство очигледно сметаат дека преку спојувањето со клиничкиот центар во Тетово ќе го надминат овој проблем.
Министерот за здравство Илир Демири, вчера на новинарско прашање ја правдаше одлуката, вели дека ако ова не се случи, вработените во лешочката болница ќе останат без плата.
Никола Цветкоски
