Возач на камион од Македонија загина во Хрватска

Возач на камион – државјанин на Македонија, загинал вчера во тешка сообраќајна несреќа на автопат во Хрватска, во подрачјето на општина Доњи Андријевци, јавија хрватските медиуми. Несреќата се случила нешто по 14 часот, кога камион излетал од патот, ја пробил централната метална заштитна ограда, удрил во два столба за улично осветлување и преминал на спротивната лента. По судирот избувнал пожар, а камионот целосно изгорел, заедно со возачот, кој останал заробен во него. На местото на настанот биле пронајдени регистарски таблички од Македонија. Пожарникарите имале сериозни тешкотии да се пробијат до запалениот камион поради густиот сообраќај. Хрватската полиција работи на утврдување на идентитетот на загинатиот возач и на причините за несреќата.