Во Собранието денеска ќе биде одбележан 11 јули – Меѓународниот ден на сеќавање на геноцидот во Сребреница.
Како што информираат од собраниската прес-служба, настанот ќе го модерира пратеникот на „Левица“ Амар Мециновиќ, а ќе се обратат претседателот на Собранието Африм Гаши, претставничката на Координативното тело за одбележување на 30-годишницата од Сребреница, Селма Ризвановиќ Мандал, претставникот на Бошњачкиот Национален Сојуз, Џевад Хот и Муамер Џанановиќ, директор на Институтот за истражување на злочинот Сарајево.
Претседателот на Собранието, Африм Гаши во понеделникот на брифинг со новинарите информира дека собраниски службеник, а не претставник на невладините организации ќе претседава со седницата. Тој е уверен дека со тоа, како што рече, нема да се повтори случајот од лани кога сеќавањето на жртвите беше злоупотребено за молитва во законодавниот дом.
