На триесет и шестогодишната Вале од Кратово, која од жртва на семејно насилство се претвори во двократен убиец, затворскиот и е заменет со домашен притвор. Таа останува во куќата на нејзините родители во Скопје. Одбраната очекува наредниот месец да започне и судската постапка во која треба да докажат дека долги години била жртва на семејно насилство. Нејзиниот адвокат е оптимист дека ќе се смени правната квалификација од убиство во акт на самоодбрана и обвинетата ќе се брани од слобода.
„Сметам некаде во септември, ако заврши истрагата со ова темпо би требало истата да продолжи во судска постапка. Моментално куќниот притвор ни е некаде до средината на септември и по подигање на обвинението ако биде правната квалификација како што ние сметаме, може да бараме негово укинуваање и обвинетата да се брани од слобода“, изјави адвокатот Христијан Георгиев.
Стручни служби се уште работат со двете малолетни деца кои по трагедијата, се згрижени кај член на потесното семејство. Се прават напори семејството повторно да биде заедно, со што полесно ќе се надминат овие тешки моменти, како за децата, така и за самата мајка, објаснува адвокатот Георгиев.
„Центарот за социјални работи во Кратово работи во подобруваање на нивната психофизичка состојба, како од страна на социјалните работници, така и од страна на стручни лица од областа на психијатријата и психологијата. Ние активно работиме да ја споиме мајката со дечињата, бидејќи сметаме дека мајчината љубов е неприкосновена, но и премногу потребна во овие моменти“, изјави адвокатот Христијан Георгиевски.
Сопружниците речиси 13 години биле во брак, а несогласувањата започнале пред пет години. Жената неколку пати го пријавувала својот насилник, а во минатото на сега починатиот сопруг, му била изречена и судска забрана во рок од една година. Убиството се случи во јуни во семејната куќа. Жената за да се спаси од сопругот кој ја тепал и давел, со кујнски нож прво го прободе него, а потоа и свекорот.
Александра Ристевска
