Жител на Кичево, осуден на една година затворска казна, не издржал ниту еден ден од изречената пресуда од кичевскиот Основен суд, бидејќи во затворот во Битола немало место?!
Двајца полицајци од Битола го привеле осуденикот и го однеле во битолскиот затвор, но таму еден од вработените им рекол дека наводно нема слободно место и неможе да го примат осуденикот. По ова двајцата битослки полицајци го пуштиле осуденикот на слобода.
Денеска, МВР сооопшти дека Одделот за внатрешна контрола поднел кривична пријава против против двајцата полицајци од Битола и против уште еден нивни колега, според која тројцата се сомничат за кривично дело неизвршување на судска наредба.
„Одделот за внатрешна контрола, криминалистички истраги и професионални стандарди до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција поднесе кривична пријава за кривично дело – неизвршување на судска одлука по член 377 од КЗ против Т.Л., И.Д. и Р.Т., полициски службеници од ПС ОН Битола во СВР Битола.
На 02/03.06.2024 прво и второ пријавениот не постапиле по писмена наредба на Основен суд Кичево за спроведување на осудено лице во казнено поправна установа заради извршување на санкција утврдена со правосилна пресуда, заради издржување на казна затвор во времетраење од една година. Имено, откако претходно бил пронајден и лишен од слобода, осудениот А.А. од Кичево, од страна на прво и второ пријавениот бил спроведен до КПУ Затвор Битола, а откако од страна на вработен во затворот осудениот наводно не бил примен поради немање на слободни места во затворската установа, прво и второ пријавениот, без да изготват било каква службена документација, го пуштиле осуденото лице на слобода без одобрение на судот, кој ја издал писмената наредба. Наведеното го извршиле со претходно одобрение на третопријавениот во својство на одговорен, кој не издал наредба осуденото лице да биде доведено и задржано во ПС ОН Битола заради понатамошна постапка спротивно на член 15 од Правилникот за вршење на полициските работи во МВР.
Одделот за внатрешна контрола, криминалистички истраги и професионални стандарди согласно своите надлежности и овластувања ќе поднесе предлог за поведување на постапка за утврдување на дисциплинска одговорност против полициските службеници Т.Л., И.Д., и Р.Т. и ќе изрече задолжителни мерки за отстранување од работното место до завршување на дисциплинската постапка“, се вели во информацијата до јавноста на Министерството за внатрешни работи.
