Затворениот базен во училиштето „Невена Георгиева Дуња“, во Кисела Вода ќе биде пуштен во употреба во 2025 година. Базенот кој беше започнат со градба во мандатот на минатата влада, основците ќе можат да го користат од мај следната година.
Министерот за спорт Борко Ристевски со градоначалникот на Кисела Вода Орце Ѓорѓиевски денеска извршија увид во градежните активности кои се во финална фаза.
„Со гордост можам да најавам дека без разлика што овој проект, почнат од претходната влада и застанат после четири пет години, мислам дека со гордост ќе најавам дека ѓи разрешивме дилемите, најдовме заеднички јазик, повторно ќе повторам со економскиот оператор и на големо задоволство на министерството и на мое лично, ќе продолжиме да ги градиме овие базениќе продолжиме да не останат едно црно ругло во секоја од општините и генерално низ Македонија“, изјави Борко Ристовски министерот за спорт.
„Овој базен, чија изградба ќе биде завршена кон крајот на мај, ќе биде модерен објект, изграден по сите стандарди и ќе им служи на пред се’, на учениците, спортистите, но и на сите граѓани. Пливањето, како еден од најкомплексните спортови, има огромно значење за здравјето и развојот на младите генерации. Со оваа инвестиција, овозможуваме не само услови за развој на спортски таленти, туку и простор за рекреација и здрав живот за сите жители на општината“, изјави Орце Ѓорѓиевски, градоначалникот на Кисела Вода.
Базенот е од затворен тип со должина 25 метри и ширина 9 метри, како и длабочина 1.2 метри односно 0.8 метри во другиот дел. Станува збор за полуолимписки тип на базен и ќе биде наменет да се користи за едукација, обука и пливање, а истиот е со ‘FINA’ стандарди.
Почна да го гради минатата влада, но не го заврши од непознати причини. Министерот за спорт рече дека нема да бидат издвоени дополнителни финансиски средства и покрај доцнењето на изградбата, но објасни дека доколку истиот се завршел порано, државата можела да заштеди на материјали.
„Цените кои што тогаш беа за изградба на еден базен се едни, после четири години со инфлацијата се сосема други, така да затоа искажав голема благодарност до економскиот оператор, кој што во заеднички договор и разговор најдовме едно решение кое што ќе биде, ќе повторам јавен инверес, без дополнителни трошкови од државата“, рече Борко Ристовски, министерот за спорт.
Со базенот кој е финансиран од Владата, ќе стопанисува општината Кисела Вода, а покрај основците од училиштето „Невена Герогиева Дуња“ ќе можат да го користат и другите граѓани.
Во фаза е изградба на уште пет вакви базени, а градоаначалникот Ѓорѓиевски објасни дека Владата ја гради и салата Расадник, но со неа ќе стопанисува општината.
Љубиша Владимиров
