Заменик-министерот за економија и труд Марјан Ристески денеска во Делчево присуствуваше на првиот бизнис-форум организиран од Општина Делчево, каде беше истакнато дека ваквите иницијативи отвораат нови можности за локален економски развој, прекугранична соработка и привлекување инвестиции.
Ристески оцени дека регионот има значаен потенцијал, особено преку соработката со соседна Бугарија и искористувањето на европските фондови и прекуграничните програми.
– Овој крај е погранично место и има одлична соработка со соседна Бугарија, особено во искористувањето на европските фондови и средства за реализација на инфраструктурни проекти. Уште поважно е што овој бизнис-форум ќе отвори нови перспективи за развој на локалната економија и за соработка на локалните компании со фирмите од другата страна на границата, изјави Ристески.
Тој додаде дека Министерството за економија и труд ќе продолжи да ги поддржува ваквите иницијативи бидејќи тие значат економски развој, нови работни места и подобрување на инфраструктурата во регионот.
За градоначалникот на Делчево, Иван Гоцевски, првиот бизнис-форум претставува почеток на една поширока иницијатива за поврзување на локалната бизнис-заедница со потенцијални партнери од земјата и странство.
– Ова претставува голема чест и задоволство што заедно со мојот тим успеавме да реализираме успешен бизнис-форум, кој планираме да стане традиција. До крајот на годината ќе се одржат уште два форума, од кои еден ќе биде посветен на нашите иселеници, со цел нивните искуства и инвестиции да се насочат кон развојот на Делчево и регионот, изјави Гоцевски.
На форумот присуствуваше и градоначалникот на Благоевград, Методи Бајкушев, кој ја поздрави иницијативата и оцени дека ваквите средби се современ пристап кон градење деловни партнерства.
– Ме радува активноста на многуте компании што учествуваат. Го поздравувам градоначалникот за оваа иницијатива, бидејќи ова е модерен пристап за градење бизнис и создавање деловни контакти. Мислам дека ова е еден нов форум и драго ми е што сум тука вечерва, изјави Бајкушев.
На денешниот бизнис-форум во Делчево учествуваа претставници на локалната самоуправа, бизнис-заедницата и институции од двете страни на границата, а акцентот беше ставен на можностите за економски развој, прекугранична соработка и отворање нови инвестиции во регионот.
