ВМРО-ДПМНЕ со соопштение реагираше на јавната објава на поранешниот премиер Зоран Заев, во кое, како што велат, тој се јавува во одбрана на својот криминал, по заплените на дрога поврзани со фирми од неговата родна Струмица. Од партијата наведуваат дека луѓе блиски до Заев и до Венко Филипче добивале лиценци за одгледување канабис за медицински цели, кои наместо за таа намена биле користени за нелегална продажба на дрога.
„Над 20 тони дрога беа изнесени само од фирмата ‘ЦБД Медплант’, во сопственост на Христијан Котев, син на Тони Котев, претседател на ОО Ново Село во времето на Заев. Заев и Венко им дадоа лиценци на овие луѓе, а гледаме како заврши истото“, се наведува во соопштението. Од ВМРО-ДПМНЕ додаваат дека Заев е „таткото на бизнисот со канабис“ и бараат тој јавно да одговори дали неговото семејство и блиски луѓе се вклучени во овој бизнис, како и како стигнал до златна виза во Дубаи.
Партијата наведува и дека постојат сведоштва од негови поранешни соработници за наводна изградба на облакодери во Дубаи, а во соопштението додаваат дека Заев, како што велат, „станува сѐ повеќе клаустрофобичен од одговорноста“.
Претходно, Заев во објава на Фејсбук реагираше на, како што наведе, континуираните лаги, клевети и навреди од ВМРО-ДПМНЕ и нејзините претставници, кои, според него, траат веќе пет години откако се повлекол од политиката. Тој побара јавно извинување од пратеникот Бране Петрушевски и од партијата, особено за, како што рече, злоупотребата на неговото име во случајот со конфискацијата на медицински канабис.
„Безобразна лага е дека сум на кој било начин поврзан со случаите со канабис што беа презентирани пред јавноста. Лага е и дека сум се јавувал во Царинската управа, како и другите измислици дека градaм облакодери во Дубаи, дека вршам притисок за купување на болницата на д-р Жан Митрев или дека се мешам во работата на институциите“, напиша Заев, додавајќи дека доколку не добие извинување во законски предвидениот рок, ќе поднесе тужба против Петрушевски и ВМРО-ДПМНЕ.
