Како лидерот на опозицијата Венко Филипче од плата успеал да изгради луксузна хациенда на три ката на Водно, вредна еден милион евра, прашуваат од ВМРО-ДПМНЕ. Пратеникот Миле Лефков, порача дека Филипче мора да одговори како стигнал до финансиски средства за така голема инвестиција, на една од најатрактивните локации во Скопје.
-Овој објект е граден во ек на министерувањето на Филипче, кога тој управуваше со милиони евра во здравството. Филипче мора да одговори како е градена оваа хациенда, како се стекнати парите за истата и дали истите се доведуваат во врска со тендери или друг вид работа со државата додека тој бил на функција. Филипче мора да одговори како се прави ваква хациенда со плата?, прашува Лефков
Лефков ја повика на реакција и од Антикорупциска. Да проверат дали можеби парите уимаат некаква поврзаност со можни тендери од периодот кога Филипче министеруваше во здравство.
-Филипче да не се обидува да користи изговори дека оваа хациенда е на името на неговата сопруга или нејзиниот татко. Тоа што истата е градена додека тој е министер говори доволно дека може да станува збор за потенцијално криење на имот на туѓо име. ДКСК да отвори случај и да истражи како е финансирана оваа хациенда и дали парите се доведуваат во корелација со некој тендер или државна работа, изјави Лефков.
Утрината во куќата за која опозицијата обвинува дека е на новиот претседател на СДСМ, можеа да се забележат мајстори, кои ги завршуваат финалните работи на овој веќе изграден објект. ВМРО-ДПМНЕ ја повика Антикорупција и да провери како Филипче набавил луксузно Ауди Q8, дали го платил со свои пари или друг го купил за него.
Матеја Петровски
