24-годишниот Влатко Орданоски беше најсреќниот меѓу 124-те пријавени верници кои во Прилеп скокнаа по Светиот крст кој беше положен во базенот од х. “Салида”. Тој досега по Крстот скокал три пати, а годинава првпат му се насмевнала среќата и да го фати. Инаку, младиот Влатко веќе две години живее и работи во Германија, а годинава се вратил во родниот крај специјално за празникот, со намера уште еднаш да си ја проба среќата.
- „Моментално живеам две и пол години во Германија. Редовно си идам за Бадник, Божик, Велигден, и за Водици, нормално. Еве, трет пат се фрлам за Крстот и оваа година ми беше најсреќна. Сега го фаќам првпат. Јас си планирам во следните 7-8 години да се вратам секако, а може и побрзо, здравје Господ. Сега верувам во Господ многу, еве баш и вчера си ја купив Библијата, сакам да ја прочитам и здравје Боже, наскоро сакам да си се вратам и тука“, – ни рече Влатко Орданоски.
Традиционално, среќниот пронаоѓач на Крстот, со пригодни награди беше даруван од ЛС и од неколку општествено-одговорни компании.
„На сите присутни, на сите мои сограѓани, им гхо честитам денешниот голем хтристијански празник „Богојавление“. Бог се јави – Водици. Ѐ Воедно и на среќниот наоѓач на Крстот – Влатко, му посакувам среќа, здравје, бериќет во неговото семејство и во семејствата на сите наши присутни христијхани, како во градот, така и во Република Македонија“, – изјави Борче Јовчески, градоначалник на Прилеп.
Инаку, денеска во Прилеп на повеќе места се положуваше Светиот крст, а втора година и во Плетварското езеро. Интересот на верниците секаде беше голем, па така, меѓу сите 124 кои денеска скокнаа во базенот, на централниот настан во хотелскиот базен, имаше и 14 девојчиња.
Колку за потсетување, последен пат, Светиот крст во базентските води беше положен во 2020 година, а потоа заради Короната, две години, односно се’ до годинава, Крстот се положуваше во малиот црковен базен од Црквата “Св.Благовештение”.
Каролина Дурло
