Потврдена е определбата на Македонија за спроведување на преземените обврски за заштита на охридскиот регион, напиша на својот фејсбук профил вицепремиереот и министер за транспорт Александар Николоски кој денеска во Париз, заедно со министерот за надворешни работи и надворешна трговија Тимчо Муцунски, министерот за култура и туризам, Зоран Љутков и министерот за животна средина и просторно планирање, Муамет Хоџа, оствари средба со генералниот директор на УНЕСКО, Калед Ел-Енани.
Македонската владина делегација со која се и градоначалниците на Општина Охрид и Општина Струга, Кирил Пецаков и Менди Ќира, оствари средби и со претседателот на 43. Генерална конференција на УНЕСКО, Конгкер Мохамад Талха, како и со претседателот на Извршниот одбор на УНЕСКО, Насер бин Хамад Ал Хинзаб.
-Разговаравме за значењето на УНЕСКО во современиот свет како единствена мултилатерална организација што промовира дијалог и меѓународна соработка во областите на образованието, науката, културата и комуникациите. Во фокусот на разговорите беше состојбата на охридскиот регион како природно и културно светско наследство, при што беше нагласена важноста од континуирана и навремена имплементација на препораките за заштита, со цел зачувување на неговиот статус на Листата на светско наследство. За време на средбите беше потврдена определбата на државата за спроведување на преземените обврски за заштита на охридскиот регион, како и подготвеноста за продолжување на соработката со Република Албанија во рамки на постојните механизми, со цел обезбедување долгорочна и одржлива заштита на регионот, информира Николоски.
Според Муцунски, станува збор за прва ваква средба со генералниот директор на УНЕСКО, на која фокусот бил ставен на охридскиот регион како природно и културно светско наследство.
-Ја нагласивме важноста од континуирана и навремена имплементација на препораките за заштита, со цел зачувување на неговиот статус на Листата на светско наследство.
Притоа, ја потврдивме определбата на државата за доследно спроведување на преземените обврски, како и подготвеноста за продолжување на соработката со Република Албанија во рамки на постојните механизми, во насока на обезбедување долгорочна и одржлива заштита на охридскиот регион, нашиша Муцунски на својот фејсбук профил.
