Пет електрични локомотиви, завршување на зградата на ФИНКИ, нова зграда за Факултетот за физичка култура, реконструкција на Болницата во Тетово, новиот Клинички центар во Штип и новата болница во Кичево, како и Дата-центарот – се меѓу 40-те проекти кои се наоѓаат на конечната приоритетна листа за јавни инвестиции усвоена од Владата.
На листата се содржани и проекти од областа на инфраструктурата, образованието, здравството, енергетиката, дигитализацијата, како и проекти од областа на земјоделството и водостопанството, вредни над 5 милиони евра.
„Првата конечна приоритетна листа, којашто е усвоена, ќе биде клучна основа за дефинирање на новите капитални инвестиции во буџетскиот процес за 2027 година, како и во инвестициските програми на јавните претпријатија и акционерските друштва во државна сопственост, што значи дека институциите при своето идно инвестициско планирање треба да се усогласат со оваа листа“, се вели во соопштението на Министерството за финансии.
Вклучувањето на предлог-проектите на конечната приоритетна листа на предлог-проекти за јавни инвестиции не значи и обврска за нивно финансирање, ниту конечна одлука за нивно спроведување.
