Владата има системски решенија за Ромите, за поквалитено образование, вработување и домување. Министерот Шабан Салиу на состанокот со невладините ромски организации ја претстави стратегијата за 2025 година со која ќе се детектираат проблемите кои ги засегаат оваа категорија граѓани, се со цел да се дојде до едно поинклузивно и поправедно општество.
Салиу објасни дека во стратегијата е наведена заедничка соработка со осум Министерства од кои ќе треба да се обезбедат дополнителни буџетски средства за решавање и подобрување на животот на Ромите.
Нашите права како и на останатите се загарантирани со Уставот рече Салиу.
„И ние сме граѓани на ова општество и ние имаме дечиња кои треба да одат во училиште имаат свои потреби и ние имаме потреба од облека храна, односно живот. Државата очекувам посебно претседателот на Владата Христијан Мицкоски со кого имам одлична соработка во претходниот период, да организираме повеќе можности, буџетот кој ќе биде во оваа стратегија и во законите на другите министерства да се зголемат“, рече Шабан Салиу, министер за интеграција и имплементација на Стратегијата за инклузија на Ромите.
Министерот објасни дека голем број граѓаните од ромската заедница во пресрет на зимскиот период, немаат огревни дрва за да се загреат. Рече дека во владата имаат разбирање за нивното барање за дополнителни 33 милиони евра за изградба на 1001 стан, а посочи дека има одлична соработка со Министерот за социјална политика, демографија и млади и дека заеднички ќе пристапат во решавањето на одредени потреби за ромската заедница.
„Со господинот Лимани очекуваме да го појачаме со нови вработени со пошироко размислување како подиректно да се реагира кај граѓаните односно кај Ромите“, рече Шабан Салиу, министер за интеграција и имплементација на Стратегијата за инклузија на Ромите.
Салиу за крај рече дека во иднина очекува поголема совест од Владата и министерствата и дека посакува искрена и доследна интеграција на Ромите, не само тука, туку и во Европа.
Љубиша Владимиров
