Македонските медиуми, продукциски куќи и филмската индустрија ќе останат без пристап до европски пари, затоа што Владата не ги почитува законите кои самата ги предлага. Програмата на Европската Uнија, наречена „Креативна Европа“, со буџет од 2,5 милијарди евра, е недостапна за Македонија.
Поранешната директорка на Агенција за Филм, Мими Ѓоргоска, вели дека причината е неодговорноста на Министерствата за информатичко општество и за култура.
- „Ова всушност е уште еден пример на непочитување на законските регулативи, што е пракса на оваа влада. Алармантен е моментот што не само што не ги почитува сопствените законски решенија, туку во континуитет нема сеопфатна хармонизација ниту со меѓународни договори, ниту со европските директиви на кои сме се обврзале.“ – Изјави Ѓоргоска.
Таа додава дека нема да имаме пристап ниту до под-програмата „Медија“, поради неусогласеност на законите. Вели дека Владата знаела за роковите на кои се обврзала, но, сепак, не ги испочитувала, иако надлежните министерства имале време од неколку години за тоа да го направат.
- „Беа запознаени дека имаат временска рамка за усогласување, сепак тие не пристапија сериозно кон своите обврски. Токму заради тоа, сега доаѓаме во оваа ситуација, каде што нашето законодавство не е усогласено со европските директиви и доведена е во опасност функционирањето на една многу значајна програма“ – Појаснува Ѓоргоска
Инаку, од земјите во регионот, во програмата „Креативна Евопа“ учествуваат и Албанија, Косово, Босна и Херцеговина, Србија и Црна Гора.
Поради непочитување на законите, тужби до министерството за информатичко општество, најавија од агенцијата за Аудио и аудиовизуелни медиусмки. Оттаму велат дека со години Владата односно Министерството за информатичко општество не им ги исплаќа законски утврдените средства, дека со месеци укажувале на тоа, но попусто.
Тужба подготвува и јавниот сервис, Македонска радио телевизија, бидејќи средствата што им биле скратени се многу повисоки и од оние на Агенцијата.
Никола Цветкоски
