Водостоите на поголем дел од реките во земјава бележат намалување во споредба со вчерашните мерења, покажуваат најновите податоци на Управата за хидрометеоролошки работи.
Минимално зголемување е регистрирано кај неколку реки. Нивото на Треска кај Македонски Брод е повисоко за три сантиметри, Пчиња кај Пелинце и кај Катлановска Бања бележи пораст од четири, односно два сантиметра, додека Струмица кај Коњарево е повисока за три сантиметри.
Најизразено зголемување е измерено кај Струмица на мерното место Сушево, каде водостојот е повисок за 24 сантиметри во однос на вчера. Пораст од 20 сантиметри е регистриран кај Црна Река, а за 18 сантиметри е зголемено нивото на Брегалница кај Штип.
Од УХМР информираат дека водостоите на трите природни езера во земјава остануваат непроменети и се на исто ниво како и претходниот ден.
