По два дена од акцијата во комбинат ОХИС во Скопје, утрово од локацијата во струмичкото село Сушица се запленува над 20 тони марихуана. Во кругот на фирмата „ЦБД Медплант“ ДООЕЛ пристигнаа еден шлепер, 10-тина помали камиони, четири комбиња, осум патнички возила на МВР и Царина. Заплената почна околу 10 часот и се уште трае. Неофицијално од фирмата ќе се запленат над 20-тина тони марихуана. Објектот е под надзор на полицијата од пред неколку дена откако почна оваа акција на Министерството за внатрешни работи.
Овој пат станува збор за поголема ззаплена, бидејќи прво на локацијата пристигна шлепер, што дополнително укажува на обемот и логистиката на криминалната операција. Според наши информации, токму „ЦБД Медплант“ претставува вториот клучен крак на истрагата што ја водат Министерството за внатрешни работи и Обвинителството за гонење организиран криминал и корупција.
„ЦБД Медплант“ според она што може да се забележи и на влезот е регистрирана на адреса с. Борисово 3 во струмичко Ново Село, како фирма за „канабис за медицинска намена – производство и трговија“. Како формален сопственик на компанијата во документацијата се јавува Христијан Котев, но според информации од терен, реалната контрола над фирмата ја има неговиот татко, Тони Котев, со прекар М`гчев.
Тони Коцев е поранешен председател на огранокот на СДСМ во Ново Село и има многу бизнис релации со Вице Заев, брат на поранешниот премиер, Зоран Заев.
Деталите од акцијата институциите не откриваат бидејќи уште се работи на терен. За сега нема официјални информации за сторени кривични дела, ниту за евентуално осомничени лица.
Претходно, од кругот на поранешниот хемиски комбинат ОХИС во Скопје, каде што е регистрирано седиштето на компанијата „Алфафарм ДОО Скопје“, беа изнесени околу десетина тони марихуана.
Акцијата следува по настаните од пред неколку дена во Србија, каде што беа пронајдени и одземени пет тони марихуана, за кои српските власти соопштија дека биле прошверцувани од Македонија и биле наменети за српскиот пазар.
