Поскапувања по пазарите и маркетите на основните производи има, но не толку поради нафтената криза, колку поради приближувањето на големиот празник Велигден. Наместо потготовка со празничен дух, граѓаните повторно прават пресметки колку можат да си дозволат за на празничната трпеза. Предпразнично, како и секоја година, цените се покачени. Главно станува збор за производите кои најмногу се користат за овој празник – јајцата, јагнешкото месо, овошјето и зеленчукот. Граѓаните сметаат дека ваквата состојба е последица на престојниот празник Велигден, но не го исклучуваат и скокот во цените на горивата. Тие велат дека ќе мора да кратат од намирниците, но сепак нема да се откажат од традиционалната Велигденска трпеза.
„Покачени се цените, јајца, зејтин. Прво дериватите покачени што се, тоа повлекува се бидејќи ние сме зависна увозна земја. Секоја година и оваа пред Велигден се покачуваат цените. Ќе си ја дозволиме трпезата но не како порано, ќе мора да кратиме.“- велат граѓаните.
Цените на намирниците се разликуваат од маркет до маркет. Табла јајца сега може да се набави по цена од 280 до 310 денари, а маслото може да се најде од 90 до 110 денари. Килограм јагнешко може да се најде за 650 денари, а телешкото чини околу 1050 денари. Свежото свинско и пилешко вообичаено се поефтини. Пример свинска плешка чини околу 390 денари, а ребрата може да се најдат и по 370 денари. Свинскиот бут може да се најде по цена од 420 денари. Пилешкото филе чини од 340 денари па нагоре во зависност од маркетот во кој пазарите.
Краставиците по пазарите се нудат по цена од 80 до 120 денари. Младиот кромид се продава по 50 денари за три парчиња.
Надлежните најавуваат дека ќе ја следат состојбата и ќе реагираат доколку има неоправдано зголемување на цените, а очекуваат од бизнис секторот да бидат фер во пресрет на празниците со цел да се заштити стандардот на граѓаните.
