Претседателката на државата Гордана Сиљановска-Давкова в петок лично ќе ѝ го честита на Радмила Шекеринска назначувањето за заменик генерална секретарка на НАТО. Како што објави Претседателката на нејзината фејсбук страница, таа остварила телефонски разговор со Шекеринска, во кој ја поканила на средба за да ѝ го честита изборот.
„Сметам дека е најдобро лично да ѝ изразам честитки за престижната функција, која е од големо значење, не само за неа, туку и за државата“, напиша Сиљановска.
Вчера и премиерот Христијан Мицкоски рече дека Владата ја поддржала кандидатурата на Радмила Шекеринска за заменик генерална секретарка на НАТО. Премиерот посочи дека за Владата националното единство и националните интереси се пред и над партиските.
