Низ игра со бројки, пари и фискални каси – учениците од основните училишта започнуваат да учат што се даноци, како се пресметува, пријавува и плаќа данок, но и како функционира УЈП. Проектот „Фискална едукација“ стартуваше во основното училиште „Браќа Миладиновци“ во Аеродром.
Целта е преку оваа активност децата да развиjат вештини и навики од нивната рана возраст за да бидат подобро подготвени за финансиските предизвици во животот – вели директорката на УЈП Елена Петрова.
“Сега одиме чекор понапред и фискалната едукација на млади ја симнуваме и во основните училишта. Едукатори од УЈП заедно со наставници од основните училишта ќе работат со децата, со учениците, на еден забавен, интерактивен начин со интерактивни, креативни игри и задачи, да им пренесат, како се собираат даноците, како се трошат парите од даноците и дека фискалната сметка не е обично парче хартија, туку е еден симбол на заеднички придонес на сите нас” изјави директорката на УЈП, Елена Петрова.
Поддршка за спроведувањето на проектот дадоа и од Министерството за образование и наука и општина Аеродром.
УЈП контуинирано врши едукативни работилници преку проектот „Фискална едукација на младите“, со кој основците но и средношколците од цела држава неколку години по ред имаат можност да добијат појасна претстава за тоа што претставува данокот и која е општествената придобивка од плаќањето на даноците.
