Судството во Македонија е бавно и неефикасно. Ова го потврдува и петмесечната фамозна достава на пресудата за двојното убиство на Вања Ѓорчевска и вцелешанецот Панче Жежовски до странките во постапката. Од јуни до ноември, во овој период судијата ја пишувал пресудата и најверојатно го запазил рокот од 45 дена за сложени предмети, но останува дилемата, што правел судот во наредните неколку месеци со доставата на одлуката. Засега нема официјално известување од судот колку време им требало на судиите да ја напишат и која е причината за задоцнетата достава. Поранешниот претседател на Судскиот совет и актуелен апелационен судија од Битола во телефонски разговор за Алфа вели дека за се постојат рокови што треба да се почитуваат, и мора однапед да се предвидат и спречат сите проблеми со доставите на судските одлуки.
Откако конечно сите инволвирани во случајот ја добија на хартија пресудата, најавија жалби. Љупчо Палевски – Палчо, Велибор Манев, Боре Видевски и Влатко Кешишев ја примиле пресудата со која се осудени на доживотна казна затвор за двојното убиство. Пресудата е доставена и до таткото на Вања, Александар Ѓорчевски, кој беше ослободен од вина поради недостиг на докази.
Дел од одбраната на осудените најави дека ќе го оспори доживотниот затвор. Според нив, во пресудата постојат неправилности, пропусти и суштествени повреди на постапката. Заради тоа ќе бараат одржување јавна седница пред Апелацискиот суд Скопје, на која планираат да ги изложат своите докази.
Жалба до Апелација поднело и обвинителството за ослободителната пресуда за Александар Ѓорчевски, кој беше обвинет за помагање при киднапирањето на неговата ќерка.
Македонската јавност и регионот беа згрозени од убиството на малолетната Вања и велешанецот Панче што се счлчи во ноември 2023-та. По неколку дена од нивното исчезнување телата им беа пронајдени во близина на Скопје и Велес.
На доивотен затвор осудени се четворица бидејќи според обвинителството тие испланирале грабнување на 14-годишната Вања со цел да присилат член на нејзиното потесно семејство да даде пари за откуп. Грабнувањето на убиениот Панче Жежовски во Велес, пак, според обвинението, било со намера да го присилат да им го даде неговото возило за да го користат за грабнување на детето во Скопје.
