Градењето на инклузивни и отпорни заедници е многу важно, имајќи ги предвид последиците од војната на Блискиот Исток. Во една ваква сложена состојба на Балканот, сведочиме на психолошки притисоци преку нагласувањето на воените капацитети и вооружувањето, анализи и дебати за наводни судири и прекројување на граници, предупредува Павле Трајанов – национален координатор за спречување на насилен екстремизам и борба против тероризам.
„Македонија е мирна и стабилна држава и има усогласена безбедносна политика со политиките на ЕУ и силни релации со САД како наш стратешки партнер. Но сепак, последиците од војната на Блискиот Исток се видливи насекаде. Растот на цените на енергијата го има и секако ќе има последици и кај нас. Во Македонија има неколку вида на екстремизам – верски, идеолошки и етнонационален радикализам“, изјави Павле Трајанов, национален координатор за спречување на насилен екстремизам и борба против тероризам.
И геополитичката аналитичарка Нела Јакшиќ вели дека состојбата во Македонија е релативно стабилна, но дека сепак ќе се соочиме со инфлација и економски предизвици, а со тоа и зголемување на цените. Според неа, потребна е континуирана анализа за воведување дополнителни мерки.
„Сметам дека мерките се досега соодветно преземени, со оглед на актуелните геополитички случувања и самиот политички дискурс во која насока се одвива. Сметам дека треба да се биде во чекор со останатите случувања и да се воведуваат нови мерки во континуитет“, изјави Нела Јакшиќ, геополитички аналитичар.
Многу е важно институциите да соработуваат со невладиниот сектор, системот за превенција да се гради дополнително, да се подобри законската рамка и посебно да се вклучи и локалната самоуправа, заклучија од Здружението на млади правници – организатори на денешната трибина.
